أخخخخخ ، بس الواحد ايش بدو يحكي ؟ يعني بنحكي وين ايام زمان ،
او لساتنا بنسب ؟ انا شخصيا متدايق ، ومتنرفز ، وسبيت اكتير ، ولهلأ عم
بسب ، ايش يا نابلس ؟. ايش اللي عم بسير ؟؟
ارجع
بالزمن اشوي لورا ، فترة اكم سنة بس ، يعني بعد الانتفاضة التانية ، او
حتا خلال الانتفاضة ، خلينا انبلش من سنة ال 2000 ، انا كنت فاتح بسطة
اصغيرة بالبلد القديمة بنابلس جنب ملحمة فخري ابو زنط للي بيعرف البلد ،
كنت ابيع العاب ام الشيقل ، هادا لما بلش الاستيراد من الصين ، وكمان ما
ننسا انو الشيقل بهداك الوئت كان بجيب اكتير اشياء ، وخاصة حسنات ! كنت
اروح على سوبر ماركت الصفدي بالبلد واللي هي كانت بوئتها متر في متر ، كنت
اشتري كاسة براد ، و3 بسكوتات امشلح للي بتزكرو ، وحبة علكة شعراوي ،
وملبستين ، وكل هاد بالشيقل ، طبعا نا كنت قدام الملحمة تبعت فخري ، وكنت
انبسط امتير لمن ايجيبو خروف يدبحو ، زي كانو بتحضر فلم ، وكانو كل 3 ايام
ايجيبو خروف اجديد ، بتزكر مرة جابو نعجة اصغيرة، فلما دبحها انا بدي اسألو
عن صدر النعجة ايش بيعملو فيه !! في براءة الاطفال سالتو : فخري طيب (ثدي )
النعجة ايش بتعملو فيه ؟ طبعا هوا فرط ضحك علي ، واخوه فرسان كمان ضحك علي
، صار يحكيلي : اصدك ( بزازها) ، بتزكر كيف صار وجي بالالوان لمن هوا اللي
حكا هاي الكلمة !!! بس المفارقة العجيبة واللطيفة اني اليوم لمن امشيت
بالبلد ، بنت اصغيرة يا دوبها واصلة 5 سنين عم بتسب عاخوها لانو اخدلها
البسكليت وحكتلو ......س اختك ! اللي هي طبعا بتكون !! عمار يا نابلس .
جمبي عاليمين محل ابو زيدان العطار ، وجمبو محل العبوة العطار ، محل
العبوة بالزات كان عبارة عن متحف كامل ، اولا المحل مبني مكان بركس خيول
سابق لقلعة قديمة للعائلة الاقطاعية المعروفة عبد الهادي ، اول ما تدخل
عباب المحل ، اتفرج عالسقف بتشوف تمساح امحنط عمرو اكتر من 60 سنة ،
عاليمين بتشوف بيضة نعامة ، عالشمال صقر ، بومة ، طبعا هادا غير قرون العاج
، غير النحاسيات والاثار القديمة جدا ،كل هادا بتشوفو بمساحة مش اكتر من 2
متر مربع ، جوا بالمحل بتدخل باقي المحل واللي هوا اكتر من 10 متر مربع ،
بتشوف اماكن نوم واكل الخيول ، ومخزن بسيط لاغراض ابو زهير العبوة ، انا
كنت اكتير احب اروح عندو واشتري علكة مستكة العربية اللي لونها ابيض ، بيجي
فيها طعم مرار ، ومنظر المرتبان اللي عمرو بكون اكتر من 50 سنة والله
والعليم ، لليوم طعم هاي العلكة ما بروح من تمي ، وجمبو ابو زيدان كنت احب
ائعد عندو واساعدو واعبي الحبوب معاه ، كنت احب اوزن عالميزان اكتيير ،
اليوم وانا مارق رحت عند ابو زهير العبوة عرفني طوالي ، وابل كما احكي
مرحبا ، حكالي والله يا سيدو مش موجود مستكة من اللي انتا بتحبها !!بجد
حسيت بخيبة امل اكبيرة ، وسبيت .
طبعا غير عن اكتير
من الاماكن اللي الها زكريات حلو اكتير ، ايش مع الطمرية ، في محل طمرية
بالبلد محل عرفات ، لليوم موجود بس الفرق اكتير بسيط عن ما كان اول، كان
لما ابو عرفات يقلي الطمرية اتشم ريحتها من اول الشارع ، وكان حقها 7
اغورات ، وحجمها اكتيير اكبير ،حبة الطمرية كانت زي العيد ، والله من اول
ما دخلت البلد وانا نفسي بهالطمرية ، روحت عند عرفات طوالي ، غير انو الحبة
صار حجمها الربع !! السعر صار الضعف ! الطعم !!! الزيت مطعم كانو الو
اسبوع مش امغير ، يعني ايش ؟ ايش بدك ؟ غير الزيت يا اخي !
بتكمل
مشوارك بتوصل لعند البلبل تبع الفلافل ، دايمن انا وحمزة كنا لما بدنا
ناكل فلافل انروح عندو ، ونحكي للناس هي ازكا محل فلافل بالبلد ، اغلطت
ورحت امجد هديك الذكرى بيني وبين حمزة ، ويا ريتني ما رحت ، انسا انو الخبز
الو من الصبح وناشف ، الفلافل محروق ! في حدا يا الله ببيع فلافل محروقة
؟؟ ايش بدي احكي بس ؟
وعسيرة الخبز والمخابز ،
نابلس والبلد بالزات مشهورة بالمخابز وافضلها على الاطلاق ، خالي كان لما
بدي اطلع على عمان يحكيلي جيب معاك خبز ، من بداية البلد عند جامع الخضر
بتبلش بمخبز الشامي والتمام ، العكر ، الشخشير ، القطب ، والله الصبح اتشم
ريحة الخبز من اخر رفيديا ، امبارح ، ما لقيت الا مخبزين فاتحين بس ، العكر
والتمام ، والعكر بعمل ازكا برازق ممكن تاكلها بكل حياتك ، لما تطلع
الصينية من الفرن اتشم ريحة السمسم المحمص من بعد 3 حارات ، والله نفسي
فيها كان ، واشتريت اشوي ، وهديل سبت عليهم قبلي هاي المرة ، غير انها
امبردة ، مش مستوية ، ما الها طعم ! بس سكر ! ، كان عمي وانا اصغير يضربني
دايمن عشان ارضا اروح على فرن التمام باخر البلد اجيب خبز ، واليوم ، فرن
التمام بعمل اسوأ خبز بنابلس كلها !
وحدة من احلا
فقرات ايامي وانا اصغير ، انروح انا واخوي واصحابنا عند حلويات الاقصى ،
طبعا المحل رقم 1 بالكنافة النابلسية ، ومصروفنا ما ايكفي نشتري نص وقية ،
نشتري كل واحد بشيقل ، وكان الحج ايحطلنا شقفة ناكلها اتكون عن وجبة بهاد
الشيقل ، اليوم وانا واقف باكل عندو اكنافة ، برا طبعا بتكون ماسك الصحن
وواقف بنص الشارع ، هاي بتعطي طعم اضافي غير طعم الكنافة ، اجو ولدين بدهم
بشيقل ، وطبعا !! ( ما في عمو بشيقل ) بقتبس من البياع ! ليش هيك ؟ ايش
الليي صار بالبلد ؟
بكفي مواقف ومحلات ، اتعبت
نفسيا من هداك المشوار ، طول عمري انا وايا حد من اصحابي لما بدنا انغير جو
او نرتاح نفسيا كنا ندخل عالبلد ونمشي من اولها لاخرها ، ندخل بالزقق
والحارات ، نمشي لحد ما نتعب ، نتفرج عالتمر الهندي والجبة والصبانات
والناس والمحلات ، والولاد اللي عم بالعبو بنانير ، بس اليوم وانا ماشي
بالبلد اتعبت نفسيا واتدايئت لدرجة اني بس ضليت اسبسب ! ما خليت حدا الا
سبيت عليه .
اسف نابلس بس اتبعبصنا !!! كنت احارب
باسمك اكتير ، عروس الضفة ، بس اليوم صرت استحي احكي اني من نابلس ، واحلا
شي بالموضوع انو امير صبيحات لليوم وبعد ما اتخرج ميت انو ايلائي شغل
بنابلس عشان يسكن فيها !! ايش رايك امير ؟ حابب تسكن بنابلس ؟